Hmingpui, Congratulations!!!

Ka hming phuahtu, ka pi chuan Lal Rin Sanga tiin min lo phuah a. Lal Rin Sanga ka ni ta a ni. Tuemawte pawh Lalrinsanga/lalrinsangi tiin an lo phuah ve a kan hming a in ang a lo ni der mai. Chungho chu Hmingpui ka ti mai. Kan tawng hi a pachhia nge, Mizo hi kan tam ve tawh hrim hrim...hmingpui ka nei teuh mai nia. Mizia dang dang, seilianna inang lo tak tak, khawsak dan hrang hrang kan ni thluah mai.

Kan tet laia kan venga awm ka Hmingpui chu sawngnawi ve tak a nia. Kum lamah phei chuan kan in rual deuh reng. Mahse pawl thum ka zirin pawl khatah a u in a paw thla hnu hnu thin. Chung lai chuan ka hriata a hming an lamri hian ka thin a ti rim tlat nia.

Ka puitlin ve deuh hnua ka tawn leh hnimhnai ve tak, ka Hmingpui chu, khawkhat tlangval tlawmngai, mi biangbiak pawh thiam tak, thu leh hla lamah pawh duai lo em em, khabe sep thiamdan phei chu ...dawt pawn ka lamah tangse ka Amen tho vang..(Pastor chuan dawt chu a sawi lo ngei anga). Khatih hun lai khan Tahan Vengchhak field a football khel en nikhua te hian nulahoin a hming an lam hian ka lo khik ve vur vur chan a awm. Ve ringawt in...

Tum loh deuhin ka Hmingpui ka char leha, hnamdang khua leh tuiah lehnghal. Pa in khaithli tak, mitmeng fim, a fing tawk tih hriat ngawih ngawih a nia. Mahse pa nelawm tak a ni. Mi rama anmahni hotu Officer ni pha hial chu pa duai a ni loang tih in hre thiam mai awm e. Tuk khat emaw chauh kan in kawm hman nan, a kal kian hnuah pawh chu khawpuiah chuan ka lal ta thut emaw ka in ti lehthin..

Distrct court hmaa thiante hnungzui ka lo thut ngawih reng laia Police Officer in ka hming a rawn lam thut kha chu ka phu nasa a nia aw.. Mahse a koh tum chu keimah ni lovin kan piaha kutkawl lo bunrun, nula hmeltha ve tak, damdawi thalo zuar an tih vanga man tawk a lo ni reng a. Kha nu ah khan ka hming tiam lohah chuan a hmel chiah kha ka awt..

Ka hming a vangin lungawina ka hmuh phah teuh ang bawkin, ka hming takngial ngei ngawih ngawih chante ka lo nei a nih cu. Mahse hming dang pu ta mai ila emaw, Sap hming han in vuah ve vehvawh ila mahse saptawng pawh thiam chuanglo ila emaw, Samuela in ti leh ringawtin Pathian tih leh A aw ngaihthlak lam tum chuang ta miahlo pek ila, engual chu ka nih phah lo ngei ang...

Ka hming chu ka hming a nia, kei leh ka hmingpuite zawng zawng tana lawmna thlen thei tur leh kei leh an hming an ngei vek lohna tur chuan Keimah tho tho hi ka lo pawimawh tihte ka ngaihtuah chhuak.. Ka ram leh hnam pawh chuti tho chu a ni.

Vawin ah hian ka hmingpui Nl. Lalrinsangi'n tling tak a Master Degree a lak a vangin ka hming ka chhuang thar leh a. Nl. Lalrinsangi ka lawmpui thu leh ka Chhuan thu ka han thai lang duh a ni.

SANGTE
CONGRATULATION ON YOUR SUCCESS,
We are proud of having you,
We are proud of your perseverance;
We are proud of your hard work.
Cos' their fruit is beautiful to our sight today.

Lrsanga

KAWLRAM MIZO CHANCHIN TLEM

Thu Lawr Khawm
from

Burma Ram Mizote

by Thang Sa Vunga (M.A. Hist.)

Burma rama Hualngote chu Chin zinga hnam (tribe) chi khat an ni. Burma national dik tak, indigeneous ziktluak an ni..British leh Kawl sorkar pawhin Hualngo tia an lo hriat, an lo registerd an ni.

Lushai Hills a mite chu 1914 atang khan Burma ram Kale valley ah an rawn pem lut tan a….Chin zinga Sihyin ho leh Zanniat ho chuan khua neiin awmhmun an lo bengbel tawh…Buddha sakhaw bia Yaw leh Shan ho chu a tam ber an ni.

1914 atanga Kawlram rawn lut tan Lushai ho chu an awmna khua leh tuiah chuan an inluling thei hle. 1920 velah chuan inn 200 dawn lai an tlin hnu phei chuan an chhuahkehna, an laichin Chin ho chu mi hnuaihnung zawka hmuin elsenna tawngkam dengkhawng tak takte hmangin an bawlzan vel thin. Harsatna an tawhin chan tha an chan theihna turin Hualngote chu tanchhanah an hmang thina chipui diktakah an chhal a, mahse Hualngote chu Chin a tanga kalchhuak thei an nih loh avangin a chang leh Lushei or Mizo atangin an ban leh bawk a…

“23rd March 1963 hi Luseite ram mi ni ve chauh angin an sawi thin. A awmze dik tak chu 1820 atanga Tiau chhaka lo chho tan tawh Lusei chu ram mi an ni daih tawh a, 23rd March, 1963 hi a ram mi nih thiehna hnuhnung ber tihna chauh a ni…..Chin zinga a ram mi ni mai lova ahranpa taka Lusei hminga a ram mi kan ni ta hi a pawimawh riauna chu a ni.” (Khampat PCM Golden Jubilee Souvenir, p. 29”

“1820 atanga Tiau chhaka la chho tan tawh Lusei” a tih chu Hualngoho hi an ni.Hualngote tan chuan a ram mi nih theihna hnuhnung ber a ni lo.A hranpa taka Lusei hminga a ram mi nih a ngai lo…1914 hnulama Burma rama lo lut Lusei ten Hualngote an tanchhan avangin citizenship an hmu thei chauh va, mahse indigeneous ni sa, Hualngote’n harsatna an tawh phah ta a ni. Hualngo ho NRC ah Lusei ho angin ‘Burma National Lusei’ tih a hranpa liau liauva chhutsak an nih avangin an citizenship nihna a lolam za ta a….An rilru put dikin an unau Chinte nen inpum khat thei ni se a tir atangin harsatna an tawk lo vang….Dawt phuah chawp Khampat leh Bungpui story pawh a ngai lo vang.

Bristish sorkarin, DC Lel Burne-a hovin, Chin Hills Battalion a din a, 1917 atangin Hualngo Company pawh din a ni. (A tiam angin) kum thum a lo tlin chuan Hualngo tlangval ho chu an bang leh ta hlawm a. Battalion Commander chuan Jamedar Hrangkhama chu tirin sipai thar tur a daptir a. Jam. Hrangkhama’n Hualngo tlangval sipai lut duh an awm tawh loh thu a report takah chuan Battalion Commander chuan “Lushai Hilla a Hualngo tlangvalte va sawm mai rawh” a ti ta a. Tichuan Lushai Hill a tlangvalte lo kalin Hualngo khaw hmingin Chin Hills Battalion ah Hualngo Company chu an din chhunzawm ta zel a. (Officer (Jamedar) kai pawh 4 lai an awm.)

II WW a lo theln dawn hnaih chuan ramri daidanna awm tawh lovin a duh a ping sipaiah an lut thei ta a. Chin Hill Battalion-a sipai tang thei te chu miten an ngai sang thei hle…Sebudar Rosuma hovin Hualngo Company chu awlsam takin an din chho zel a. Mahse 1943 October-ah Lushai Hills atanga sipaite chuan an chawbel pawh zah zo lovin Hualngo Company chu Luhei company a let turin Battalion Commander hnenah thu an pu lut ta thut mai. Mahse Japan an lo thlen hnai tawh a vingin Commander chuan chung thu ngaih tuah hun a nih rih loh thu a lo sawipui a, a tam zawk chu an lungawi mai a. Jam. Saikunga (Saillo), Muallung Khua, erawh chu a lungawi ve theih loh avangin Commander chuan Kumauni Vai Company lamah a thawn ta daih a.

1943 November ah Japan ho Falam an lo thleng. Chung huna Hualngo Company Commander chu Sebuder Thangthiauva (Zimte Khua) a ni. 1944 January thla a Tlangzawl khuaa an inhmuh khawmnaah Sebudar Thangthiauva’n Jem. Saikunga Vai dum kara a han hmu chu a khawngaih em avangin Batallion Commander hnenah a dilsaka Hualngo Company ah a la lut leh ta a…

Indopui IIna ral a reh hnu hian Lushai Hills atangin Burma ramah mi tam tak an pem lut a. Burma sorkar pawhin Chin chi khat an nih avangin a ram mi an nih theih thu a puang a, foreigner lo lut angin a en lo. Chin Regulation Act ah pawh Chin ah Lusei chu a huamtir a ni. Mahse Lusei hruaitute chuan ‘Chin zinga kan tel chuan chanvo leh hlawkna engmah kan nei dawn lo. Lusei hmingin a hranga kan din hi a tha zawk’ tiin ro hran an vaw ta a…..Lusei hmingin Burma sorkar chu an dawr ta a…

Heng hun lai hian (1949s ?) Burma ramah political party lian Anti Fascist People’s Freedom League (AFPFL) chu Stable leh Pure tiin inthenna a awm a, Lisei hruaitute chuan Stable AFPFL party lam an pawk a, an be pawp thei ta a. (1949 vela din tan ‘L’ Committee hminga bepawp an nih hmel. Lrs) U Kyaw Ngeing-a chairman niin Pu Thanghleia pawh member-ah a tel. Special priviledge hmuh an tum a vangin Kale-Kabaw phai zawl neih tumin Khampat phuahchawp story an vawrh darh a, Burma Rama Chin, Kachin, Karen, Shan, etc, anga national group pakhat anga din an tum ta a ni. Chung hun laia Burma Lusei ho thawm natzia chu tawrhmawhawm tak a ni. Hualngo leh Pawi hmuhsihna deusawnna in an khat a, inzahderna awm hauh lovin hmaichhanah fiamthu thawhna a tan an hmang thin….

1960 Inthlanpuiah Luseite belh Stable AFPFL Party an tlawm ta hlauh mai. Lusei chungchang pawh a reh leh rih. Pure AFPFL party-a MP, Chin Affairs Council-a Chairman Pu Za Hre Liana lo kalin, ‘Nangni leh keini intihrang thei kan ni lo. Tang tlang tur zawk kan ni. Lai-Mizo din ila, chutah chuan zai khatin I luang ang u’ tiin sawipui mahse an duh chuang lo.

2-3-1962 niin General Ne Win-a leh a sipaite’n sorkarna an la a, Revolutionary Council an din a, 4-7-1962 niin Burma Socialist Programe Party tiin ram hmahruaina chu an kuthum ta a ni. Lusei hruaitute pawhin 18-19 May, 1962 ah Lusei Welfare Organization an din a, Revolutionary Council Chairman chu an dawr leh ta a ni. LWO thiltum chu Khampat nghenchhana central MP pahnih neih a ni. Revolutionary Council kalpui tum dan nen chuan a inpersan hle. Tin Burma ram constitution-ah ram bung hrang nei lo tan MP a hrana neih theih a ni bawk lo. “Chin Hills-ah Hualngo ram khua leh tui kan nei” han ti thin mahse Chin ni lo tan Chin Hills-ah chanvo a neih theih loh avangin kawng a kaw ta chuang lo a ni. 20 August 1962 niin LWO hmingin Revolutionary Council Chairman hnenah petition an pe lut a. (He petition ah hian point 9 vel a awm a chung zingah chuan citizenship hmuh tih leh Kabaw Valley hi Humhalh bik bial enkawltu department kut hnuaia dah ..tih a tel. lrs)

General Ne Win-a chu Lusei sipai huaisen chawimawina lawman dawngte hming chhalin an dawr ta a. Lusei chungchang pawh an sawi leh thei ta a ni. Sorkar chuan Mah Mah Operation tiin an chungchang chu a ngaihtuahpui leh ta a. Col. Lun Tin-a leh Col. Van Kulh-a te Kalemyo lo kalin Luseite hi Burma ram citizen-ah sorkarin a pawm theih thu an rawn puang ta a ni.

“Kalemyo leh Tamu biala Luseite hi kan rawn chhui dawn che u a ni. Burma citizen ni duh apiang pawm in ni ang. A duh lo zawng chu hnawhchhuah in ni ang. Tunhnuah in rawn kir leh thei tawh lovang.”

Mah Mah Operation a zova, 23rd March 1963 ni atangin Luseite chu National Registration Card pek chhuah an ni ve ta a ni. Mahse indigineous dangte ang lovin an NRC chungah ‘Burma National Lushai’ tia chhinchhiah bik an ni. Hualngo belhchhana NRC nei an nih a vangin Hualngo ho NRC ah pawh ‘Burma National Lushai’ tih an chhutsak a, an buai phah hle.

Chin Hills Regulation Act hmasa ah chuan, “Chin tihah hian Chin Hills-a chengte bakah Lusei, Kuki leh Naga an tel” tih a ni. Mahse Rangoon a India Ambassador-in “Lusei, Kuki leh Nagate hi India mi an ni a, he dan hi siam that a nih loh chuan India sorkar a lungawi lovang,” a tih avangin 1957 Chin Special Regulation Act ah Lusei, Kuki, leh Nagate chu telh an ni tawh lo. Chu thu chu a bul a bal hre lovin, “Chin zing atangin Luseite min ban” tiin vuivaihna an zawng leh a, mahse chhuanlam mai a ni.

(Luseiho hian Chin zinga tel hi an lo duhlo hle niawm a ni. 1st Chin Battallion Headquaters, Ma-U-Bin khuaa a awm lain an Commander Col. Putpa hnenah ‘Nangni fangra ei ho nen thawhho kan duh tawh lo. 9th Burma Regiment-ah min sawn rawh’ tiin an dil ni awm e. Lock-up a a dah hnuah sipai tang chhunzawm duhzawng in an chhunzawma a duh lo Sgt. Namchina, Rfm. Vomkunga, Lalhleia leh Sangvungate chu a court marshall a ni an ti. Kei chuan induh leh inngawihropui vang ah ka ngai. Inngaih ropui chawp ngai lovin ropui tak tak zawk se la chu an ti maih loving. Lrs)

Burma ram constitution duanna a lo tel fo tawh Deputy Commissioner, Pu Savuta’n Lusei hruaitute sawmin, “Constitution tlangpui chu duan fel a ni ta. Mahse hnam tenau chungchang ngaihtuah leh tur a la awm. Lusei leh Hualngo chu a hranga ding thei kan ni lo. Lusei chu Hualngo nilo mahse Hualngo chu Lusei a nih ang bawkin Chin pawh a ni. Chin atanga per hrang thei a ni lo.Hnam chungchang dan siam hunah Lusei-Chin tiin awm ho ila a tha ber ang” tiin a sawm a A then chuan thil awmdan hre thiam takin, “Burma rama kan awm chuan Chin kan ni mai a, India rama kan thlen leh Lusei kan ni mai a lawm” tiin sawmna chu an pawm a. Mahse Chin nih duh lo ho chu mei kawha tan an lak a vangin sawmna chu a hlawhtling ta lo a ni.

Hualngo chu indigeneous an ni a, Hualngo (Lusei tih zawk tur a nih ka ring mange. Lrs) atanga ban theih a nih loh ang bawkin Chin atanga kal chhuakin Lusei a din pawh a theih loh a ni. Lusei ziktluak dik tak mah niin zo tlangsanga cheng Mizo dik tak pawh ni mahse Burma ram a tan chuan Hualngo tia tribe pakhata lo registered tawh an ni. Hmakhawsang atang tawhin Chin Hills ah ram an nei a, Lentlang leh Tiau inkarah khua 58 an lo din a ni. Tiau thlangah pawh khua 12 an din. Chhunchung leh Sukte nena an indo thu sawi a ni thin. Mahse hnam dangte nen chuan inthian tha, a thlum a al ei za, nupui pasalah pawh lo innei an ni. Par-tin-lawr, lung lem nei lo, luang thli chhem nghin theih mi an ni lo. Thlahtute atang renga dikna ngaina mi an ni. An thusawiah an cheng a, an thutiamah an rinawm bawk. Hnam dang hmusit mai lova thiana siam duh mi an ni.

INSUIHKHAWM NAN THU TLEM

Thuhma
Insuihkhawm zai rel kan tum a nih chuan lungruallo, ngaihdan hran nei, tihdan phung in ang lo, hma hran la pawl pakhat ai a tam kan awm tih a chiang a. Tunah hi chuan kan Mizo khawvel zimte a insuihkhawmna lam kan thlur bik dawn a ni.
Zofate Insuihkhawm nan Thu Tlem
Keimahni mai a awm lova kan thenawm unaute nen inzuihkhawm kan duh tak tak a nih chuan lehlam lehlam in chan tawk kan neih a tul tih kan hriat a pawimawh a. Kan huang a zau zawk nan a kan sumlu capital anga kan ngaih theih a pawimawh hle ang.

1. Tum Thuhmun Hmachhawp Neih
Group pahnih insuihkhawm tur chuan beiseina thuhmun emaw tum thuhmun emaw kan neih a ngai. Kan tan tlana kan sual chhuah tur Tum Thuhmun kan neih a, Lungrualna leh thawhhona chu pawl pahnihte thawh ho dan (strategy) a nih ve ve hunah chauh kan insuihkhawm tak tak thei ang. Pentecost ah pawh an lungrual hnuah chauh Thlarau Thianghlim an chan kha (Acts 2:1).

2. Egocentric Thought Dahbo
Rawngbawl sak tur ni lova, rawngbawl tura lo kal Isua zuitu te hian KEI kan in tihna kan dahbo a ngai thin. Kan duhzawng ringawt chawi vawng lova kan tanghma haina rilru kan dah bo theih hunah Pathian khawngaihna kan chang thei ang. Chu chuan kan mitte tivar in insuihkhawm thiamna te min pe dawn a lo ni. Chumi kan thiam hma chu Mizo in Zomi nih a duh lovanga Zomi in Mizo nih a duh bawk hek loving.

3. Hmangaihna Thinlung Neih
Roreltu leh mi hausa dinhmun an chuan hmangaihna thinlung neih a awl thin. Mahse chu hmangaihna erawh chuan kan ho theih leh kan tanpui duh tute bak a huam zo thin lo. Insuihkhawm duhtu chuan a thu tawmpui lo tu leh ngaihdan dang deuh neitu pawh hmangaihna thinlungin a tawhpui thei tur a ni.

4. Intluktlanna Pawm
Intluktlanna hi kan duh theuh a, mahse kan thuneihna leh chanvo awmsa erawh mi dang sem kan harsat theuh avang hian insuihkhawm hi a har phah thin. Pawl pahnih insuihkhawm tur chuan thuneihna leh chanvo te thlenga kan in sem tawn a kan in tawm theih hunah chiah insuihkhawm zai kan rel tak tak thei ang. “Kan in suihkhawm ang a, ka thu thu in awm rawh aw,” kan tih chung chuan lungrual tak a insuihkhawmna chu kan hlawhtling mawh viau in a rin awm.

5. Unity in Diversity
Mi dangte danglamna kan hmu mawi thei lo a nih pawhin anmahni dang lam dan ang anga kan pawm thiam a pawimawh. Mahni hnam lam chauh mawi ti tlat mi kan nih chuan kan hnam lam kha midang hmuhah a mawi loh phah thei hial zawk a sin. Tihdan in ang lo tak tak, nunphung dang dang leh ngaihdan hran hran kan awmho tal tal a, ro khat kan rel tlan theih hunah chiah insuihkhawm chakna leh mawina chu kan hmu thei ang.

6. Mi Chi hrang hrang khung khawm thiam (Eph. 4:12-16)
Insuihkhawma thawhhona hmala tur chuan mi zia hrang hrang, thiam zawng in anglo tak tak leh vei zawng dang dang kan awmkhawm thiam hmasak a tul a ni. Chu chuan pawl hmalakna a ti chak mai ni lovin a ti changtlung ang a, chu thawhhona ah chuan mi tin kan leng za thei ang.

7. Remna Siamtu nih
Mi tam tak chuan buaina awm lo hi peace/remna emaw kan ti thin. Remna dik tak chu mi tin lung si taka an lengza hi a ni. Remna vawngtu (Peace Keeper) chuan buaina a awm dawn ai chuan rilrem em em anga a tawrh ngawt ngawt chan a awm fo. A chak zawk pawhin kan tihdan thin a ni tih changchawia ngaihdan thar pawm loh bur leh thlak thiang lo tluka ngai in chakna an lekkawh duh thin. Insuihkhawm duh tak tak tur chuan remna vawngtu (peace keeper) mai ni lova Remna Siamtu (peace maker) nih a tul a ni. Chu chuan tihdan phung a innghat mai lovin khawvel her ang zela ngaihdan thar lo chhuak te pawh mitin lungsi taka an len za theih nan a ngaihtuah(consider) tel ngei ngei tur a ni. Chu chuan pawl hmasawnna tur ngaihdan thar a siam ang a, pawl chakna tur hmalakna kawng dik a hmuh fiah tir thei ang.

Tlang Kawmna
Insuihkhawm hi keini zofate tih makmawh leh kan thiam hleihtheih loh thil a ni. Bristish colonial rule in min lo then darh hnuah pawh Sap leh Kawl ten divide and rule policy a tun thleng min vai hi kan hre thiam hlei thei lo. Unau min in hauh tir mai ni tawh lovin, hmelma en takin min in en tir tawh a nih hi. Thangthar ten chu chu hrethiamin kan chanthat nan a unaute hua mai lovin unaute zawng chhuaka tanho dan kawng i zawng zel zawk ang u. Zofate hi kan vai pawhin in-nghir-ngho tham kan la awm bawk si lova.

Zantlai Lasi

Pasaltha leh huaisen tehna sangber ka lo hriat thin chu "Lasi zawl thei" tih a ni. Mahse, kei pa azawnga pa dawi ber, zanzun zun dawn tak ngial pawha bula mu nuber khawngtho talh thin hian kan tawn ve mial chu!!! Tawmna tur ramngaw kan tuk kawlh sak zawh avangin khaw chhungah a rawn lut ve ta ni ngei tur a sin. Ti hrim hrima kan ram thing leh mau kan suasam zawngin planet danga natna hrik mak pui pui thlengin khuaah min la rawn runin a nia ka rin!!! A ni, Lasi hmu tawhte'n hmeltha ti lo an awm loh ang bawkin ka Zanlai Thiani hi a hmel chu en thianglo tluk a ni e. Chuvangin, koh duat nan "Bawihsuk" ka ti. Amah pawhin a hnial hmel loh .

Ka Bawihsuki hi zakzum tak a nih ang bawkin mihring hmuhah a inlar duh ngai meuh lova, chuvang ni hmiang zanah chauh mi rawn tlawh thin a, kei pawhin a hmel ka hmuh lawk loh ni. Pian nalh tak, a nghawng rek pawh zuih nalh fahran, a vun rawng pawh sen taitek, a mawngbawr phei chu mipa tana hmuh rual ruala Baibul leh nupui fanaute theihnghilh a, han ben thuak thuak loh theih pawh a ni lo. Ka uar emaw in ti a niang e, hmu ve mah ula han beng lo chuan in chhuah hauh lovang. A hmu tawh leh beng tawh tam zawk hian a rim tal a hnim zui fo reng a nia. Tin, a tin hi a zuah tungsawl sel mai a, a zakzum mi fiam duh si hian ip chawih chawih phaha mi sih neuh neuh nan a hmang tangkai viau lehhngal. Chu mawlh chu a nia ngaia ka neih theih loh mahse mi rawn tlawh loh zana ka khua ti har thin em em chu.

Hun rei a nih hmain a tel lo leh Bawihsuki ngaihtuah lo chuan zan mut han tuah ka thiam ta der lo mai a. Ka khum bula ding chunga ka dar leh ban vel a rawn zutna an dal ang tih hlauin bang lam hlat theih tawpin ka khum ka pawtsa thin a, ka muthilh hma chuan a rawn chuankaina thin ber ka awngphahte chu ka zut ka zut zantin thin. In lama nupui fanaute'n an hria ang tih ka hlauh em avangin tu hnenah mah ka sawi ngam bawk si lo. Chuti chung chuan chhun enga han hmachhawn a, ka tiam thu duhthusama han fah malh malh ka chak dan chu, mak tak a ni. Bawihsuki nena ka duhthusama hringnun han hmang thei tur chuan neihthinglung khawnga Gentling Highland leh KLCC Tower han fan pui pawh ka huam a sin.

Bawihsuki ngaihtuah reuh reuh chunga ka computer ka thutchilh mek laiin… awi awi awi… ka rei, a rawn chhun len hlauh chu!!! Mahse, a hmel zawng mi lan duh chuang hauh lo. A pawi ka ti lo, thiante'n an hmu ve ang tih ka hlau deuh tlat. Bawihsuki nen zawng ka thikthu hi ka sum zo lo a ni ber e. Mi hmuh hlau ve tak hian ka dawhkan kil lamah tanhmun a rawn khuar a. A lang lo chin ka ke atangin mi a zut heuh heuh tanin ka malbul thuk takah mi a rawn chul heuh heuh a. Tin, ka ngaihsak loh a hlauh avangin mi sik leh neuh neuh bawk a. Mahse, kianga mite mitmei ven a ngai ve tlat. Zak tak chungin "Bawihsuk, i huangtau lutuk deuh!! kha lam zawng I tan deh chu sawi loh en pawh a thiang lo a nia, neitu nei tawh a nih kha" ti paha zuk nuai nawk nawk ka rual thut a. Ka lo nuaina lutuk nge ni dawn a titau ta mai a, mi kalsan zai a rel mai zawng… ka khua a ti har ngei mai. Thiante hriat hlau tak chung chuan amah hrereng chungin ka pindanah ka lut a, ka kalh te te a, a mi sihna chu ka va en lehngawt a. Amah chu hmuh tur a awm tawh lo.

Zan khat chu Bawihsuki rawn lengin mi a deh dan atang khan amah chauh a ni lo tih ka hrethiam a. Aw thlum mawi tak hian "kan hrailengte pawh an rawn tel ve a sin" rawn ti thangkhawk raih raih hian ka hre thut. Awi awi awi, kei hi mi rinawm lo ber em ni ka lo nih!! Anchhia ka phur ta ngei ang. Lasi thawnthu ka hriatve dan pakhat "an hmangaih mihring hnenah hian an bula awm mai mai pawhin an thisen an lo hip hman a, chu chuan fanau an lo hrin sak thin" tih hi ka rilruah a rawn lut thuta. Karei karei karei… kei hi, harsatna sukiang tur leh chhungkaw hmakhua zel tur inti ngaiin ramdang ka kal a, in lamah nupui fanaute harsa takin ka hnutchhiah a ni si a. Kei hian rinawm loh sanin, fanau dang ka nei ang maw…Nula hmeltha leh hausa pawh ni lo, lasi lakah lehhngal. Heivang hian nge ni ang ka chawei a tui theih der loh a, ka thisen tlem ka chauh ngawih ngawih thin ni??? Mahse, Bawihsuki zun atanga tal chhuah zawng Malaysia awm rei tawh midang pawhin har an ti ve ngei ang tiin ka inhnem tlat a. Chumi zan Bawihsuki rawn leng chuan mut a ti tui ta der lo.

Chuti fakaua ka nun mi ti bawrhbangtu leh thiante hma pawha hmainghallo a mi siam thintu chu ka man ang a, ka zawt ang. Ka nihna zawng zawng ka hrilh ang a, chuti chunga mi hnualsuat dawn loh a, a rinawm dawn chuan dam chhung atan biahthu thlungin ka nemnghet ang. Chepa thanga awk ta lai leng tiin chumi zan zet zawng pawngsen tlaivar pawh huam hial ka ni. Bawihsuki rawn thlen hun tur bak chu thil dang nghahhlelh ka nei lo. Zanlai a pel hnu pawh a, a la rawn inlar ta lo chu Mut zai pawh ka rel theih lohna chhan chu a ni e. A mak khawp, lasi thiltihtheihna hi. A rawn thleng dawn tihah chuan mi hi a thlim hian a thlim delh delh mai zuk nia. Ka meng hlei thei lo. Mahse, ka in ti paukhauh lui a, thinthi chuan ka muhil lo. A rawn thleng. Thawm dim em em hian kan pindan kawngka chu a rawn hawng a, ka'n men ruk pawhin ka hmu thei lo. Mahse, Bawihsuki a rawn thleng a ni tih ka hriat theihna zawk chu ka bengbula a kut vai thawm a ni. A dan pangngaite hian duat takin mi rawn zut leh ta. Ka darah, tin ka bengbulah. Ka za chum chum. Mahse, ka muhil der tlat a. Mi tihharh tum ni awm tak hian a tin zum sin silsel chuan mi a rawn sik bawl kual leh ta a nih chu. Ka la harh tha duh lo. A huangtau sawt hle. Chutah le… khat, hnih, thum … patling ka zam neih zawng zawnga rang ber thawhin ka ban ka vai. Ka manta a chawnbanah. Hreipui thing tu thei chu sawi loh, sekibuhchhuak pawhin intlan dawn se ka phal thak lo. Bawihsuki chhuah leh ai chuan kawl bawng sakei seh a ni mai. A hmel eng phiau, a pian nalh tawk leh, a chawnban kimtlang mawi tak en tum chuan vuan reng chungin ka tho a, ka mei kan swich on chiah chu.. A mawng ka beng chiang a nia aw..chu khumfa chu. A zun atanga tal chhuah dan hria in awm mial lo maw??? Mi hrilh ve teh un.

Ka Thuhlute Hi

Siamtu ropui zia leh fin zia haichhuah zawh rual loh la inphum tinten zinga he khawl thluak nei lo hai chhuaktu hian Siamtu malsawmna leh duhsakna pawh lo dawng tam bik viau mahse ka thik phakah ka ngai awm love. Kei tehlul hian Thu Hlu chu ka nei lo tih hre reng mah ila mi thuhlu thamral mai tur ka lo kawl that ve chhunte dah nan a hman ka duh zawk a vangin Kathuhlu chu kan ti ta mai a nih hi.