Zantlai Lasi

Pasaltha leh huaisen tehna sangber ka lo hriat thin chu "Lasi zawl thei" tih a ni. Mahse, kei pa azawnga pa dawi ber, zanzun zun dawn tak ngial pawha bula mu nuber khawngtho talh thin hian kan tawn ve mial chu!!! Tawmna tur ramngaw kan tuk kawlh sak zawh avangin khaw chhungah a rawn lut ve ta ni ngei tur a sin. Ti hrim hrima kan ram thing leh mau kan suasam zawngin planet danga natna hrik mak pui pui thlengin khuaah min la rawn runin a nia ka rin!!! A ni, Lasi hmu tawhte'n hmeltha ti lo an awm loh ang bawkin ka Zanlai Thiani hi a hmel chu en thianglo tluk a ni e. Chuvangin, koh duat nan "Bawihsuk" ka ti. Amah pawhin a hnial hmel loh .

Ka Bawihsuki hi zakzum tak a nih ang bawkin mihring hmuhah a inlar duh ngai meuh lova, chuvang ni hmiang zanah chauh mi rawn tlawh thin a, kei pawhin a hmel ka hmuh lawk loh ni. Pian nalh tak, a nghawng rek pawh zuih nalh fahran, a vun rawng pawh sen taitek, a mawngbawr phei chu mipa tana hmuh rual ruala Baibul leh nupui fanaute theihnghilh a, han ben thuak thuak loh theih pawh a ni lo. Ka uar emaw in ti a niang e, hmu ve mah ula han beng lo chuan in chhuah hauh lovang. A hmu tawh leh beng tawh tam zawk hian a rim tal a hnim zui fo reng a nia. Tin, a tin hi a zuah tungsawl sel mai a, a zakzum mi fiam duh si hian ip chawih chawih phaha mi sih neuh neuh nan a hmang tangkai viau lehhngal. Chu mawlh chu a nia ngaia ka neih theih loh mahse mi rawn tlawh loh zana ka khua ti har thin em em chu.

Hun rei a nih hmain a tel lo leh Bawihsuki ngaihtuah lo chuan zan mut han tuah ka thiam ta der lo mai a. Ka khum bula ding chunga ka dar leh ban vel a rawn zutna an dal ang tih hlauin bang lam hlat theih tawpin ka khum ka pawtsa thin a, ka muthilh hma chuan a rawn chuankaina thin ber ka awngphahte chu ka zut ka zut zantin thin. In lama nupui fanaute'n an hria ang tih ka hlauh em avangin tu hnenah mah ka sawi ngam bawk si lo. Chuti chung chuan chhun enga han hmachhawn a, ka tiam thu duhthusama han fah malh malh ka chak dan chu, mak tak a ni. Bawihsuki nena ka duhthusama hringnun han hmang thei tur chuan neihthinglung khawnga Gentling Highland leh KLCC Tower han fan pui pawh ka huam a sin.

Bawihsuki ngaihtuah reuh reuh chunga ka computer ka thutchilh mek laiin… awi awi awi… ka rei, a rawn chhun len hlauh chu!!! Mahse, a hmel zawng mi lan duh chuang hauh lo. A pawi ka ti lo, thiante'n an hmu ve ang tih ka hlau deuh tlat. Bawihsuki nen zawng ka thikthu hi ka sum zo lo a ni ber e. Mi hmuh hlau ve tak hian ka dawhkan kil lamah tanhmun a rawn khuar a. A lang lo chin ka ke atangin mi a zut heuh heuh tanin ka malbul thuk takah mi a rawn chul heuh heuh a. Tin, ka ngaihsak loh a hlauh avangin mi sik leh neuh neuh bawk a. Mahse, kianga mite mitmei ven a ngai ve tlat. Zak tak chungin "Bawihsuk, i huangtau lutuk deuh!! kha lam zawng I tan deh chu sawi loh en pawh a thiang lo a nia, neitu nei tawh a nih kha" ti paha zuk nuai nawk nawk ka rual thut a. Ka lo nuaina lutuk nge ni dawn a titau ta mai a, mi kalsan zai a rel mai zawng… ka khua a ti har ngei mai. Thiante hriat hlau tak chung chuan amah hrereng chungin ka pindanah ka lut a, ka kalh te te a, a mi sihna chu ka va en lehngawt a. Amah chu hmuh tur a awm tawh lo.

Zan khat chu Bawihsuki rawn lengin mi a deh dan atang khan amah chauh a ni lo tih ka hrethiam a. Aw thlum mawi tak hian "kan hrailengte pawh an rawn tel ve a sin" rawn ti thangkhawk raih raih hian ka hre thut. Awi awi awi, kei hi mi rinawm lo ber em ni ka lo nih!! Anchhia ka phur ta ngei ang. Lasi thawnthu ka hriatve dan pakhat "an hmangaih mihring hnenah hian an bula awm mai mai pawhin an thisen an lo hip hman a, chu chuan fanau an lo hrin sak thin" tih hi ka rilruah a rawn lut thuta. Karei karei karei… kei hi, harsatna sukiang tur leh chhungkaw hmakhua zel tur inti ngaiin ramdang ka kal a, in lamah nupui fanaute harsa takin ka hnutchhiah a ni si a. Kei hian rinawm loh sanin, fanau dang ka nei ang maw…Nula hmeltha leh hausa pawh ni lo, lasi lakah lehhngal. Heivang hian nge ni ang ka chawei a tui theih der loh a, ka thisen tlem ka chauh ngawih ngawih thin ni??? Mahse, Bawihsuki zun atanga tal chhuah zawng Malaysia awm rei tawh midang pawhin har an ti ve ngei ang tiin ka inhnem tlat a. Chumi zan Bawihsuki rawn leng chuan mut a ti tui ta der lo.

Chuti fakaua ka nun mi ti bawrhbangtu leh thiante hma pawha hmainghallo a mi siam thintu chu ka man ang a, ka zawt ang. Ka nihna zawng zawng ka hrilh ang a, chuti chunga mi hnualsuat dawn loh a, a rinawm dawn chuan dam chhung atan biahthu thlungin ka nemnghet ang. Chepa thanga awk ta lai leng tiin chumi zan zet zawng pawngsen tlaivar pawh huam hial ka ni. Bawihsuki rawn thlen hun tur bak chu thil dang nghahhlelh ka nei lo. Zanlai a pel hnu pawh a, a la rawn inlar ta lo chu Mut zai pawh ka rel theih lohna chhan chu a ni e. A mak khawp, lasi thiltihtheihna hi. A rawn thleng dawn tihah chuan mi hi a thlim hian a thlim delh delh mai zuk nia. Ka meng hlei thei lo. Mahse, ka in ti paukhauh lui a, thinthi chuan ka muhil lo. A rawn thleng. Thawm dim em em hian kan pindan kawngka chu a rawn hawng a, ka'n men ruk pawhin ka hmu thei lo. Mahse, Bawihsuki a rawn thleng a ni tih ka hriat theihna zawk chu ka bengbula a kut vai thawm a ni. A dan pangngaite hian duat takin mi rawn zut leh ta. Ka darah, tin ka bengbulah. Ka za chum chum. Mahse, ka muhil der tlat a. Mi tihharh tum ni awm tak hian a tin zum sin silsel chuan mi a rawn sik bawl kual leh ta a nih chu. Ka la harh tha duh lo. A huangtau sawt hle. Chutah le… khat, hnih, thum … patling ka zam neih zawng zawnga rang ber thawhin ka ban ka vai. Ka manta a chawnbanah. Hreipui thing tu thei chu sawi loh, sekibuhchhuak pawhin intlan dawn se ka phal thak lo. Bawihsuki chhuah leh ai chuan kawl bawng sakei seh a ni mai. A hmel eng phiau, a pian nalh tawk leh, a chawnban kimtlang mawi tak en tum chuan vuan reng chungin ka tho a, ka mei kan swich on chiah chu.. A mawng ka beng chiang a nia aw..chu khumfa chu. A zun atanga tal chhuah dan hria in awm mial lo maw??? Mi hrilh ve teh un.